Geskiedenis |
Pieter Hendrik is skynbaar soos al die ander kleinkinders van die stamvader in die wyk "Achter de Sneeuwberg" in die Graaff-Reinet (latere Cradock) distrik, nie ver vanaf die Visriviergrens, gebore. In hierdie dae was aanvalle deur die Xhosas op boereplase nog aan die orde van die dag. Daar kan afgelei word dat Pieter Hendrik saam met sy ouers dieper die binneland ingetrek het, soos wat al die trekboere van daardie tyd gedoen het. Tydens hulle omswerwinge het hy sy vroutjie ontmoet. Hulle moes reeds voor 1838 in die sentraal Vrystaat aangeland het, want sy jongste suster is daar in die huwelik bevestig.
Pieter Hendrik en sy gesin het hulle skynbaar in die omgewing van die latere Boshoff gevestig, waar hy 'n veeboer op die plaas Leeupan in die distrik Boshoff was. Na die dood van sy vrou trou hy weer gedurende 1874 op 62-jarige leeftyd met die weduwee Viljoen (52). Met die uitbreek van die Tweede Vryheidsoorlog 1899-1902 was hy reeds n man van diep in die tagtig. Toe die Britse magte die Boere vrouens en kinders in konsentrasiekampte begin plaas het, is hy ook in die kamp op Bloemfontein geplaas. Onder die haglike omstandighede wat in hierdie kampe geheers het, sterf hy in die ouderdom van 89 jaar en 6 maande.
|
|