| Geskiedenis |
|
Hy en sy tweelingbroer (f1) word gebore onder die sterrebeeld Libra (weegskaal) en 'n weegskaal het in albei van hulle se lewens 'n baie groot rol gespeel. Jan skryf matriek aan die einde van 1936 te Rouxville en sluit vroeg in 1937 aan by die destydse Departement van Naturelle Sake. Hy word gestasioneer by die magistraatskantoor, Hlabisa in Zoeloeland. Daarna word hy verplaas na Nquto, Zoeloeland. Hy slaag die eerste deel van die Staatsdienseksamen in die Regte gedurende 1940. Met die uitbreek van die Tweede Wêreldoorlog is hy besig met verpligte militêre opleiding in die Umvoti Mounted Rifles. Hy sluit by die SA Lugmag aan, waar hy in 31 Eskader, waar hy tot aan die einde van die oorlog dien. Hy verrig aktiewe operasionele diens as navigator op bomwerpers in Italië. Teikens wat hulle gebombardeer het, was geleë in Italië, Frankryk, Joegoslavië, Oostenryk en Griekeland. Gedurende die oorlog tree hy op 16 Oktober 1943 te Oos-London in die huwelik met Elma Henning. Na die oorlog hervat hy sy werk in die Staatsdiens en word op Melmoth, Zoeloeland gestasioneer, waar hy sy regstudies voltooi en in die magistraatskantoor as Assistant-Magistraat werk. (Die term ‘Landdros’ is nie in die Tuislande gebruik nie). Na Melmoth doen hy diens te Enqcobo (Transkei), Pretoria, Butterworth (Transkei), Vryburg, Taung, Hammanskraal en toe vir vyf jaat as sekretaris van die Ciskeise Departement van Justisie, met die rang van Hoofkommissaris (of Hoofmagistraat). Daarna dien hy as lid van die Appél- en Egskeidingshof, King Williamstown tot en met sy uittrede met pensioen op 1 Oktober 1978. Hierna verhuis hulle na George. Hy het gedurende sy loopbaan duisende hofsake verhoor en ook dikwels as assesor in die Hooggeregshof gesit. Hy het in sy jonger dae tennis, pluimbal en gholf gespeel, en gehengel.
|
|
