Geskiedenis |
Tydens sy eerste huwelik was hy op die plaas Grootvlei en sy vrou op die plaas Kraaifontein, Burgersdorp woonagtig. Hy boer na sy troue in die distrik Albert (Burgersdorp).
Met die uitbreek van die Tweede Vryheidsoorlog gedurende Oktober 1899 sluit hy as ’n Kaapse rebel by die Colesberg kommando aan. Hy doen diens in die Transvaal. Terwyl hulle in die omgewing van Komatipoort voor die Britse magte uitvlug, vlug hulle oor die Mosambiek grens en soek skuiling by die Portugese owerhede in Mosambiek. Hier word hy en sy seun Jan Adriaan (e3), saam met talle ander Boere geïnterneer en na Portugal oorgeplaas, waar hulle in die klooster te Alcobaca gehuisves word.
Tydens hul verblyf te Alcobaca het Frederik as leermeester in Timmerwerk (houtwerk) vir medegeïnterneerdes opgetree. Sommige van die waentjies wat hy gedurende hierdie tyd gemaak het, verskyn op foto 98 in die foto-album. Na die oorlog verhuis hy na Johannesburg, waar hy as skrynwerker werk.
|
|