| Geskiedenis |
Olivier (of Boet, soos hy deur al sy familie genoem is) begin sy skoolopleiding by ’n plaasskool op die plaas Nimwegen, in die distrik Aliwal-Noord en hy voltooi sy skoolloopbaan aan die Tegniese Skool Oos-London. In 1948 doen hy St 9 en 10 in een jaar en word aangewys as hoofseun van hierdie groot seunsskool.
Januarie 1949 begin hy ’n loopbaan as vliegtuig werktuigkundige by die Suid-Afrikaanse Lugdiens. Gedurende hierdie tyd werk hy eers in Germiston, toe Palmietfontein en daarna by Jan Smuts Lughawe. Hy bedank in Maart 1953 en gaan boer saam met sy pa op die plaas Toekoms, Aliwal-Noord distrik, vir ’n jaar lank.
In April 1954 begin hy as passer-en-draaier te werk vir die groep Frazers & Chalmers by hul uraanmyne te Welkom, Virginia en Orkney. Vanaf Januarie 1957 tot Junie 1958 stuur Frazers & Chalmers hom vir dieselfde doel na hulle myne in Noord-Rhodesië (nou Zambië).
In Junie 1957 ontmoet hy Letitia (Aletta Henriëtta) De Kock op sy tuisdorp, Aliwal-Noord. Hulle tree op 10 Oktober 1958 in die huwelik.
Vanaf Julie 1958 werk hy as werktuigkundige en werkswinkelvoorman vir onderskeidelik Manning& Patterson, die Afdelingsraad en James Weir.
In 1961 koop hy die plaas Oosterlig, digby die Aliwal-Noord warmwaterbronne. Die plaas was op daardie stadium ’n kaal stuk grond, wat hom £25 per morg gekos het. Hy boer egter deeltyds terwyl hy steeds met sy voltydse betrekking voortgaan. Vanaf Junie 1973 werk hy vir die Departement Landbou Tegniese Dienste te Aliwal-Noord - eers as werktuigkundige en vanaf 1975 as Senior Voorsieningsadministrasieklerk.
Letitia werk tot en met haar aftrede gedurende 1999 vir die Poskantoor te Aliwal-Noord.
|
|
