| Geskiedenis |
|
Gedurende die Anglo-Boere-oorlog 1899 - 1902 sluit hy as 'n Kaapse burger by een van die rebelle-kommando's aan, maar word krygsgevangene geneem. Sy nasate beweer dat hy te Ceylon aangehou is, hoewel sy naam nie op enige van die krygsgevangenelyste verskyn nie. 'n Horlosieketting en borsspeld wat hy van visbeen gemaak het tydens die tyd wat hy op Ceylon aangehou is, is deur sy nasate aan die Henning Familiebond geskenk vir uitstalling in die Kerkpleinmuseum, Aliwal-Noord. 'n Foto van hierdie twee items verskyn ook by sy rekord en in die foto-album. As burger van die Kaap van Goeie Hoop, word Johannes Benjamin Frans op 5-5-1902 deur ’n spesiale kommissie wat deur die Kaapse regering aangestel is, aan hoogverraad skuldig bevind. Sy skuldigbevinding spruit voort uit sy simpatie en hulpverlening aan die Boeremagte van die Vrystaatse Republiek tydens die Tweede Vryheidsoorlog 1899 - 1902. Sy vonnis was dat hy vir ’n tydperk van vyf jaar nie vir enige openbare amp verkies mag word of in enige sodanige verkiesing mag stem nie. In die dokumente wat voor die kommissie gedien het, word sy adres gedurende hierdie tyd as die plaas Meerdewyk, in die Aliwal-Noord distrik aangegee. Sy vader is op 28-8-1901, en sy broer Jacobus (e4.) is op 15-5-1902 aan soortgelyke oortredings skuldig bevind.
|
|
