| Geskiedenis |
|
As jong seun het hy waggestaan op die Basoetogrons. Hy het deelgeneem aan die Tweede Vryheidsoorlog 1899 - 1902 en was een wat tot die end toe geveg het. Hy het eers onder Kmdt (latere Genl) J H Olivier gedien en later onder Kmdt W D Fouche. Sy huis en al sy besittings is gedurende die oorlog deur die Britse magte verwoes. Gedurende die tyd dat die Engelse begin het om die Boerevrouens en kinders in konsentrasiekampe te plaas, het sy vrou Elizabeth op die plaas Vaalbank in die distrik Aliwal-Noord gewoon. Sy het op 'n stadium met 'n kar en vier osse ingery dorp toe. Die Engelse het haar osse afgeneem en haar aangehou. Nadat sy 'n week lank aangehou is, en na vele gesmeek het hulle haar op £500 (pond) borgtog vrygelaat. Sy is dadelik terug plaas toe. Daar aangekom was die kommando van Kmdt W D Fouche, waarvan haar man lid was, op die plaas. Aangesien sy nie na die kamp wou teruggaan nie, het sy te perd saam met die kommando gery. Haar man het vir haar blyplek by 'n mnr Kruger in die Burgersdorpdistrik gekry, waar sy tot die einde van die oorlog gebly het. Na die oorlog moes Hermanus Johannes nie net van voor af alles weer opbou nie, hy moes ook sy vader, moeder, broers en susters en twee weeskinders versorg, totdat elkeen sy eie bestaan kon maak
|
|
