Geskiedenis |
Barend Jacobus Henning word gebore op sy ouers se plaas, Heuningkrans in die distrik Albert (Burgersdorp). Toe sy ouers en meeste van hul kinders in 1905 na Argentinië emigreer, bly hy en sy ouer broer, Joseph Jooste in Suid-Afrika agter.
Hy trou op 8 Januarie 1906 in Burgersdorp met Johanna Marthina Coetsee *1888 en bekom ongeveer dieselfde tyd die plaas Knapdaar in die Burgersdorp distrik. Sewe van hulle agt kinders word op die plaas Knapdaar gebore. Sy liewe vrou, Johanna ontval hom gedurende 1939 en hy besluit hierna om na Schweizer-Reneke te verhuis, waar hy die plaas Boomplaas koop.
Hy raak bevriend met die weduwee Martha Rebecca Hand (gebore Van Zyl) *9-3-1897 en hulle trou gedurende die vroeë 1940's op Schweizer-Reneke. Vir hulle word daar op 26 Februarie 1943 ‘n babaseuntjie, Pieter Hendrik gebore.
Barend Henning was 'n gesiene vee- en graanboer van die omgewing en reisigers het dikwels op sy plaas kom oornag. Hy het gereeld boeke gevat en Sondae kerk gehou vir die plaaswerkers, waartydens almal op die stoep moes kom sit en luister. Hy het ook aan hulle nagmaal bedien.
Daar was ryk fosfor-riwwe op die plaas, wat in die nag gegloei het. Die swart mense het geglo dat dit spoke was.
Barend Henning sterf op 30 Maart 1951 en is in die plaasbegraafplaas op Boomplaas, Schweizer-Reneke begrawe.
|
|