| Geskiedenis |
In verskillende reeds gepubliseerde algemene genealogiese werke word Jan Hendrik se naam as Johan Hendrik aangedui - dit is egter foutief. Sy korrekte naam was beslis Jan Hendrik want alle oorspronklike rekords wat geraadpleeg is (sy eie doopregister, sy kinders se doopregisters, sy kinders-, sy vrou en sy eie sterfregister, die opgaafrolle) gee sy naam as Jan Hendrik aan. Hy word groot op sy ouers se plaas, Elandskraal, in die wyk "Achter de Sneeuwberg", in die Graaff-Reinet distrik. Sy eggenote het nie ver van hier, in die Camdebo groot geword.
In die opgaafrolle (belastingopgawes) van 1809 word aangedui dat Jan Hendrik nog ongetroud is en by sy ouers op hulle plaas Elandskraal woon. Hy het egter reeds `n boerdery van sy eie aan die gang gehad en het die volgende besit: 4 x aanteelperde, 14 x aanteelbeeste, 150 x skape, 110 x bokke. Sy vader het ook die buurplaas Roode Taaibosch besit.
Gedurende 1819, toe Jan Hendrik se vader 79 jaar oud was, het hy opgehou boer en onder andere die plaas Roode Taaibosch aan Jan Hendrik oorgedra. As gevolg van die groot droogte wat tussen die jare 1820 en 1823 geheers het, het Jan Hendrik hierdie plaas gedurende 1821 laat lê en permanent die binneland in getrek.
Dit blyk of Jan Hendrik Henning en sy gesin as trekboere vir baie jare rondgeswerf het. Hulle moes reeds voor 1838 in die Sentraal Vrystaat aangekom het, want hulle jongste dogter, Elsie Johanna, is gedurende 1838 te Bloemfontein in die huwelik bevestig. Hulle seun, Jan Hendrik, en sy eggenote, het ook gedurende 1842 ’n babaseuntjie te Smithfield gedoop, waarby hulle getuies was. Aan die ander kant is sy eggenote en hulle skoondogter Hendrina (vrou van b9.c3.) gedurende 1850 en 1852 onderskeidelik op die plaas Blaauwkrans, nie ver vanaf die teenswoordige Nieu Bethesda in die Graaff-Reinet distrik oorlede. Dit dui daarop dat hulle tog ’n permanente basis gehad het, waarnatoe hulle van tyd tot tyd teruggekeer het.
Jan Hendrik en sy kinders het hulle mettertyd in die Boshofdistrik gevestig, waar hy oorlede is.
|
|