| Geskiedenis |
|
Jan Hendrik en sy eerste vrou word albei in die wyk Achter de Sneeuwberg, distrik Graaff-Reinet (latere Cradock), gebore. Mettertyd trek hy saam met sy ouers verder Noord. Tydens hulle omswerwinge as trekboere ontmoet hy sy vroutjie. Hulle moes reeds voor 1838 in die sentraal Vrystaat aangekom het, want sy tweede kind, Jan Hendrik, word vroeg in 1842 te Smithfield gedoop en sy jongste suster is gedurende 1838 te Bloemfontein in die huwelik bevestig. Hulle het ook gedurende hierdie tyd tot in die Transvaal getrek, want verskeie plase is gedurende hierdie tyd aan sy pa en/of aan hom toegeken. Die plase "Hennopsrivier" aan die Waterberg en "Twee Rivieren" aan die Selonsrivier is op 3-1-1840 aan ‘n J Henning en Jan Henning onderskeidelik toegeken. In beide gevalle kan dit sy pa of hyself wees, of dit kan een plaas aan sy pa en een aan hom wees. Sy eggenote Hendrina sterf egter gedurende 1852 in die jeugdige ouderdom van 33 jaar op die plaas Blaawkrans nie ver vanaf die teenswoordige Nieu Bethesda in die Graaff-Reinet distrik. Sy moeder is twee jaar vroeër op dieselfde plaas oorlede. Dit dui dus daarop dat hulle ’n permanente basis in die kolonie gehad het waarnatoe hulle van tyd tot tyd teruggekeer het. Met sy eerste vrou se dood was hulle oudste kind slegs 13 jaar oud, terwyl die jongste nog nie eens twee jaar oud was nie. Hy tree kort hierna weer in die huwelik met die weduwee Smith, wat ook drie kinders van haar eie gehad het.
|
|