Geskiedenis |
Hendrik Jacobus, of Soon soos hy genoem is, was ’n wamaker en grofsmid van beroep. Hy en sy swaer, Stephanus Johannes Marais, die eggenote van b9.c3.d9. het saam twee plase besit, naamlik Hammanskraal en Putfontein. Hulle het met beeste geboer. Hammanskraal is as winterweiding gebruik, terwyl Putfontein as somerweiding gebruik is. Die ou skoolgeboutjie te Putfontein is deur hom en sy swaer, Stephanus Marais (eggenote van d9.) gebou. Die skool het die naam Henning Marais Skool gehad. Met die uitbreek van die Anglo-Boere-oorlog gedurende Oktober 1899 sluit hy by die Heidelberg kommando aan en dien eers onder Kmdt JD Weilbach en later onder Kmdt C Spruyt. Hy neem deel aan gevegte te Dundee (1899), Ladysmith (1899), Chrissiesmeer (1900), Modderrivier (1900), Dalmamutha (1900), Koedoesrant (1900) en verskeie kleiner gevegte in die Heidelberg distrik. Tydens die geveg by Koedoesrant gedurende Maart 1900 word hy in sy linkerhand verwond en hy verloor drie van sy vingers. Later het hy doof geword as gevolg van ’n bom wat naby hom ontplof en sy oordromme gebars het. Hy het verderaan van ’n bokhorinkie as gehoorapparaat gebruik gemaak. Soon Henning het op 85 jarige ouderdom dood gebrand. Hy het gelê en pyp rook en aan die slaap geraak. Die bed het vlam gevat en hy het dood gebrand.
|
|