| Geskiedenis |
Hy woon aanvanklik saam met sy ouers op die plaas Hoba, in die Grootfontein distrik in Suid-Wes Afrika (Namibië). Mettertyd gaan woon hy by sy ouer broer, Andries op ‘n onbewerkte plaas in die Outjo distrik. Daar was geen water of ‘n huis op die plaas nie. Hulle het ‘n grashut gebou om in te woon en ‘n put vir water gegrawe.
Later keer hy terug na Suid-Afrika, maar moes allerhande werkies doen om te oorleef, soos taxi bestuur, rioolslote grawe en loodgieterwerk doen. Hy kry ‘n goeie werk op die bek-en-klouseerkampe op die grens tussen Suid-Afrika en Mosambiek en in 1938 aanvaar hy ‘n pos as wag by die staalfabriek in Pretoria.
Gedurende 1941 trek hy terug Suidwes toe om sy ouers te help. Daar in Outjo ontmoet hy sy toekomstige vrou. Uit hierdie huwelik, wat heelwat langer as 60 jaar geduur het, is 5 kinders gebore.
In 1946 trek hulle na Tsumeb — weer na ‘n onbewerkte plaas sonder enige infrastruktuur. Baie swaarkry en hard werk om aan die lewe te bly en die plaas op te bou, volg.
In 1974 word die plaas verkoop en hulle verhuis na Hentiesbaai, Noord van Swakopmund. Na ‘n paar jaar verhuis hulle weens gesondheidsredes na Windhoek. Hierna volg Vredefort, Trichardt, Bethal en laastens die Sederberg Aftree-oord in Pretoria.
|
|
