Geskiedenis |
Gert is gebore te Goedehoop, distrik Schweizer-Reneke, naby Bloemhof. Hy en Johanna was in dieselfde skool, maar vyf jaar ouer as sy. Later het hy gaan woon en werk in Pretoria. Hy en twee van Johanna se broers, Barend Jacobus (g4) en Louis Johannes (g6) was vriende en het nie ver van mekaar af gewoon nie. Op 'n keer het Johanna vir haar broer Louis kom kuier en ontmoet toe weer vir Gert Jordaan daar. Hulle het spoedig daarna 'n verhouding begin.
Gert het 'n werk aanvaar in Durban by die Colenso Kragstasie. Hy het baie verlang na sy vriendin, Johanna Henning. Hy het vir haar geskryf om met die trein vir hom te kom kuier. Hulle het dieselfde dag as wat die trein in Durban aangekom het met 'n spesiale lisensie in die landdroshof getrou. Die naweek daarna is hulle egter weer in die kerk getroud. Die klimaat in Durban het ongelukkig nie met Johanna geakkordeer nie en sy het ernstige asma-aanvalle gekry. Na mediese advies was hulle verplig om weg te trek en het hulle terug Pretoria toe getrek. Gert is op 20 Desember 1956 aangestel as Adjunk Geregsbode vir die Magistraatsdistrik Pretoria. Hy het hierdie werk gedoen tot en met sy aftrede. Na sy aftrede stig hy sy eie besigheid as Balju/Sheriff vir die Pretoria Landdros. Talle prokureurs het het hom gereeld genader vir advies, weens sy breë wetskennis.
Hy en sy vrou, Johanna Martina (gebore Henning) was 64 jaar lank getroud toe sy in 2011 oorlede is.
|
|