Geskiedenis |
J P van der Walt begin met sy teologiese studies aan die Gereformeerde Teologiese skool, Burgersdorp kort voor die Anglo-Boere-oorlog. As gevolg van die oorlog word sy studies onderbreek en hy laat vaar dit. Later voel hy tog geroepe om vir predikant te leer en hervat sy studies. Toe hy in Desember 1908 sy proponenteksamen in Potchefstroom aflê was hy dus reeds 30-jaar oud. ’n Maand later aanvaar hy die beroep na die kombinasie Waterberg-Soutpansberg. ‘n Jaar later tree hy in die huwelik met Miemie (Maria Magdalena) Henning en die pastoriepaar vestig hulle te Nylstroom. Omdat Ds JP feitlik die hele Noord-Transvaal bedien het, was hy soms vir tot ses weke op ‘n keer van die huis afwesig, sonder dat sy vrou enige tyding van hom ontvang het. Die egpaar moes onder uiters moeilike omstandighede arbei aangesien die gemeente nog moes worstel ná die Anglo-Boere-oorlog en groot armoede geheers het. J.P. van der Walt en sy vrou, Miemie was net twaalf en ’n half jaar getroud, want op 2 Augustus 1922 is hy, sewe-en-twintig dae voor sy 44ste verjaardag, in Johannesburg aan kanker oorlede ná ’n bittere lyding. Sy dokter op Nylstroom het hom aangeraai om daarheen te gaan vir ’n operasie.
|
|