Geskiedenis |
Ongelukkig kon geen sterfkennis van Pieter Hendrik of sy eggenote opgespoor word nie, gevolglik is die name van al hulle kinders nie bekend nie. Pieter Hendrik het in die distrikte van Rouxville en Aliwal-Noord geboer. Voor die Tweede Vryheidsoorlog 1899 - 1902 het hy op die plaas Rus-en-Vrede in die Rouxville distrik geboer. Met die uitbreek van die oorlog het hy en sy twee oudste seuns op kommando gegaan en dien in die Rouxville Kommando - Laer Caledon Veldkornetskap. Hulle het onder Genl Cronje aan die slag van Magersfontein deelgeneem. Met Genl Cronje se oorgawe op 27 Februarie 1900 by Paardeberg, slaan hulle op die vlug en sluit hulle by Genl Prinsloo se gevegsmag aan. Toe Prinsloo op 30 Julie 1900 by die Brandwaterkom in die Fouriesburg distrik aan die Britse magte oorgee, is Pieter Hendrik en sy seuns, Sarel Gerhardus en Johannes Petrus Jonker gevange geneem en na die Groenpunt kamp in Kaapstad geneem. Daarvandaan is hulle as krygsgevangenes per skip na Ceylon geneem. Aan die einde van 1902 het hy weer teruggekeer na 'n afgebrande plaashuis, wat met verloop van tyd egter weer opgebou is.
|
|